জীৱনৰ ভিন্ন চিত্ৰ

ফু মাৰি উৰুৱাই দিব পৰা তিনিটা কথা । জীৱনৰ ভিন্ন চিত্ৰ ।

১) জীতেন কছাৰীয়ে তেতিয়া আমাৰ ঘৰত কাম কৰিছিল । বয়সীয়াল মানুহ কিন্তু তজবজীয়া । জেওঁৰা দিয়ে, জংঘল কাটে । কাণৰ কাম নাই । একেবাৰে নুশুনে । আকাৰ ইংগিতত নুবুজিলে লিখি দিব লাগে । এদিন কাগজ এটুকুৰাত লিখি দিলোঁ : দুলালৰ দোকানৰ পৰা মিঠৈখিনি আনকগৈ । মোৰ চাইকেলত নাহিল ।
পঢ়ি জীতেন কছাৰীয়ে ক'লে :
বাৰু । কিন্তু তই আখৰ ঠিক কৰিবি । মাষ্টৰৰ ল'ৰা আখৰ ভাল হ'ব লাগে । তিনিচুকীয়াকে লিখিবি ।
কৈ তেখেতে হাঁহিলে ।
আখৰ ভাল কৰিবলৈ কোনে কোনে কৈছিল পাহৰিলোঁ । গাত লাগিছিল জীতেন কছাৰীয়ে কোৱাৰ দিনাহে । সেইদিনা ৰাতি আখৰ তিনিচুকীয়া কৰিছিলোঁ ।
জীতেন কছাৰী আছিল বেলেগৰ ঘৰত কাম কৰা মানুহ ।

২) দিল্লীত থাকোঁতে এদিন ৰিক্সাৱালাক নতুন যেন দেখি সুধিলোঁ : আগতে দেখা নাই তোমাক !!
নাই । নতুন । আগতে ভাইয়ে ৰিক্সা টানিছিল এই জেগাত । পাঁচমাহ খৱৰ নোপোৱাত মই বিচাৰি আহি গম পালোঁ সি হেৰাল । তাৰ পাছত ময়েই তাৰ ৰিক্সাটো টানিব লগা হৈছে । পিছে মই হেৰালে আৰু মোক বিচাৰি অহা মতা মানুহ নাই আৰু ! তাৰ বিবি আৰু মোৰ বিবি বাচ্চাহে ঘৰত ।

৩)পঁচানব্বৈ টকা হ'ল মাছত । পাঁচ টকা খুচুৰা নাই দাদা । পিছত নিব । হ'ব দে । এই মাছ বাচি থকাটো তোৰ ল'ৰানে?? হয় দাদা । পঢ়িছেনে ?? হয় পঢ়ে । কিন্তু…
বাপেকৰ কাষতে গ্ৰাহকৰ বাবে মাছ বাচি থকা পুতেকে কথা শুনি হাতৰ হাথিয়াৰ খন্তেকৰ বাবে থৈ মাছৰ তেজ লগা গোন্ধোৱা হাত দুটা একলগ কৰি অতি ক্ষীপ্ৰ নমস্কাৰ এটা মোক দি আকৌ মাছ বচাত লাগিল ।
মাছ বেপাৰীৰ ল'ৰা !!

টকা পাঁচটা সি পালে ।

যোৱা সপ্তাহত

১) দোকানৰ পৰা ওলাওঁতেই অসাৱধানবশত: বাহিৰত ৰৈ কথা পাতি থকা ভদ্ৰলোকৰ ভৰিত মোৰ ভৰিৰে আঘাট কৰি অভ্যাসবশত হাত এখন কপালৰ ফালে নি ক'লো: অ' কৃষ্ণ কৃষ্ণ ! বেয়া নাপাব । ভদ্ৰলোকেও হাতখন কপালৰ ফালে নি একে সুৰত ক'লে : কৃষ্ণ ! একো নাই …। ভদ্ৰলোকৰ মুখত এমুখ ডাড়ি আৰু মূৰত গোল টুপী আছিল।

২) গনেশগুৰিৰ ফ্লাই অভাৰৰ তলত ৰাষ্টাৰ কাষত ঢলপুৱাতে পুৰি ভাজি খাই থাকোতে গ্ৰাহক অলপ কম হোৱা সময়ত পুৰিৰ দোকানীয়ে পকেটৰ পৰা ফোনটো ওলিয়াই ফোনত সৰু সৰুকৈ ক'লে : সোণ উঠিলনে?? তাক পঢ়াৰ আগতে হাতৰ আখৰ লিখোৱাবা । মই আঠটা মানতহে যাম । অংক মই চামগে ।

বাপেক ।

৩) অফিচলৈ যাওঁতে দেখিলোঁ মানুহ ঘৰৰ আগত এখন ১০৮ এম্বলেঞ্চ ৰৈ আছে আৰু ছোটা ভীমৰ স্পৰ্টিং পিন্ধা আঠ-ন বছৰীয়া ল'ৰা এটাই গাড়ীখনৰ পিছফালে ভৰি দিয়া খনত মুখেৰে শব্দ কৰি ওলমি আছে । ধেমালি ।
অফিচৰ পৰা ওভতি আহোতে দেখিলোঁ ল'ৰাটোৱে ধূতি পিন্ধি গাত বগা চেলেং কাপোৰ লৈ চোতালত আমন জিমনকৈ বহি আছে ।

৪) আজি । ইচ্ছা কৰি অকণমান বৰষুণত তিতি কিমান ভাল লাগিল লিখিম বুলি ভাবি আহি থাকোতেই দেখিলোঁ মাকে কোলাৰ কেঁচুৱাটোৰ মূৰত পলিথিনৰ ঠোঙা, ঠোঙাৰ ওপৰত নিজৰ চাদৰখন দিও তাৰ/তাইৰ হাঁচি ৰখাব পৰা নাই । ৰাষ্টাৰ কাম কৰা মানুহ । আমাৰ বিলাসিতা, সিহঁত বাধ্য, ভাগ্য ।