প্ৰশংসা

আলুৰ চপ কোনে বনাইছে? ফুৱাই ফুৱাই গৰম আলুৰ চপটোৰ এটুকুৰা মুখত ভৰাই দোকানীক সুধিলোঁ । সংকোচেৰে দোকানীয়ে ওলোটাই সুধিলে - কিয় সুধিলে ? উত্তৰ দিলোঁ -বৰ ভাল হৈছে । দোকানীয়ে সন্তোষ পালে । মিচিকিয়াই উত্তৰ দিলে -ফেমিলিয়ে বনাইছে । ফেমিলি?? হয় । মানে মোৰ মাইকী মানুহে । অ' আচ্ছা ।

কৈ থোৱা ভাল যে সন্ধিয়া ঘূগুনি বা আলুৰ চপ হ'ল মোৰ অতি প্ৰিয় । দিল্লীত থকা অৱস্থাত এই দুবিধ বস্তু আমাৰ দৰে সোৱাদৰ নাপাই মই বৰ মনোকষ্টই পাইছিলোঁ । তেনেদৰে আজিলৈকে বাহিৰৰ তিনিখন ডাঙৰ চহৰত থাকি আহিলোঁ যদিও আমাৰ মূলুকৰ সোৱাদৰ গজা আৰু চিঙৰা ক'তো বিছাৰি নাপালোঁ । ইয়াত অফিচত জইন কৰাৰ দিনৰে পৰা মই অফিচৰ ল'ৰাটোৰ হতুৱাই গজা আৰু চিঙৰা আনি তাৰে সতে অফিচত আবেলিৰ চাহকাপ খাই কিমান তৃপ্ত হৈছোঁ কথাৰে বুজাব নোৱাৰিম । গজা আৰু চিঙৰাৰ প্ৰতিটো কামোৰতে উপলব্ধি কৰিছোঁ যে ওভতি আহি মই বৰ ভাল কামেই কৰিলোঁ । আনকি সদায় গজা চিঙৰা আনিবলৈ দিয়া দেখি অফিচৰ পেজবয় ইছলামে সুধিছেই - আপুনি বহুত দিন এইবোৰ খাবলৈ নাই পোৱা নেকি!! হয় বোপাই ! নাই পোৱা । হৰেক ৰকমৰ উত্তৰ ভাৰতীয় খাদ্য খালোঁ যদিও আবেলিৰ এই চাহকাপ আৰু এই দুটাৰ অভাৱ বাৰুকৈয়ে অনুভৱ কৰিছিলোঁ ।

তাৰ মাজতে আজি বাছৰ পৰা নামি এই ঘূগুনি আৰু আলুচপৰ দোকানখন আৱিস্কাৰ কৰি মই কিমান আনন্দ পাইছোঁ আপুনি নুবুজিব ।

কিবা এটা ক'বলৈ গৈছিলোঁ কথা গৈ ক'ৰবাত ওলালগৈ । এইবোৰ কাৰণতেই জীৱনত লিখিব নোৱাৰিম ।

বাৰু । আলুৰ চপ ভাল হোৱা বুলি শুনি দোকানী আনন্দিত হ'ল । ক'লে তেখেতৰ ফেমিলি মানে মাইকী মানুহে বনাইছে । হেঁতাখনেৰে ঘূগুনিৰ থালখন লৰাই লৰাই তাৰপৰা ধোঁৱাৰে সৈতে ঘূগুনি অলপ মোৰ আলুৰ চপৰ ওপৰত দিলে মোৰ প্ৰশংসাৰ বাবে কমপ্লিমেন্টেৰি হিচাবে । তাৰ পিছত তেখেতৰ মুখৰ কথাখিনি অসম্পাদিতভাবে এনেধৰণৰ -মানুবোৰ ভাল নহয় দিয়ক । কোনোবা দিনা অকণমান নিমখ বেছি হ'লে একদম হাল্লা লগাই দিব । কিছুমানে পইচাই নিদিয়ে । কিন্তু ভাল হ'লে এটা শব্দ নকয় ভাল হোৱা বুলি । ভাল হ'লে ভাল বুলি শুনি ভাল লাগে । মইও গৈ ফেমিলিক ক'ব পাৰোঁ যে কাষ্টমাৰে ভাল পাইছে । তাইও ভাল পাব বনাবলৈ । অকল পইচা পালেই নহয় দিয়কচোন ।

অতি তৃপ্তিৰে আলুৰ চপ দুটা ঘূগুনিৰে স'তে বেঞ্চিখনত বহি খাই খাই কথাখিনি শুনিলোঁ । আলু চপৰ দোকানীৰ জিভা হ'লেও কথাখিনি সঁচা । অকণমান বেয়া হ'লেই হাল্লাত ধৰণি কঁপে । কিন্তু ভাল হ'লে প্ৰশংসা কৰিবলৈ কৃপনালী ।

ভাল কামৰ প্ৰশংসা সকলোৱে আশা কৰে। ৰিডাৰচ ডাইজেষ্টত পঢ়িছিলোঁ - খুউব সুন্দৰকৈ প্লেন এখন মাটিত নমোৱাৰ পাছত পাইলটেও আশা কৰে কোনোবা যাত্ৰীয়ে এয়াৰ হোষ্টেচৰ যোগেদি হ'লেও তেওঁক কওঁক - ধন্যবাদ এই সুন্দৰ লেণ্ডিংৰ বাবে । কিন্তু সেই সৌজন্য অতি দূৰ্লভ । এহেজাৰত এক ।