নিম্ন-মধ্যবিত্তীয় সুখ পাগুলি আছোঁ অলস সন্ধিয়াটোত ।
১) টিভি আহিব এপ্ৰিলত । ব'হাগ বিহুৰ আগে আগে । বাঁহডাল কটা হ'ল মাৰ্চতে । দীঘল, পোন । বাঁহডাল চাওঁ-- বাঁহ দেখিয়েই বিশেষজ্ঞই মতপোষণ কৰে - ফটো ভাল আহিব । সঁচানে ?? ইচ !
টিভি আহিবলৈ তেতিয়াও পোন্ধৰ দিন বাকী ।
২) ৰুলনম্বৰ এক হ'লে অ'মেগা এটা পাম । লগতে উইংচাং এটা । এতিয়া নুতন আৰু বিটেক্স ।
৩) নতুন জোতা । প্ৰথম জোতা । নিপিন্ধোঁ । বোকা লাগিব ।
লাইট থকা জোতাযোৰ এক অলীক সপোন !
৪) মেট্ৰিকৰ আগে আগে হৰলিক্স এটা । ভাত, কল, জলপানে যি কৰিব নোৱাৰিলে, হৰলিক্সে কৰি কামাল দেখুৱাব এইবাৰ !
৫) গাড়ীখন গ'ল । গোন্ধটো ৰ'ল ।
৬) মামাহঁত চহকী মানুহ । স্কুটাৰ আছে ।
৭) সিহঁতৰ দেউতাক ধনী । "ৰঙীল" টিভি কিনিছে ।
৮) লগা, আমাৰ টিভিৰ আইনাত ৰঙা-নীলা কাগজ লগা । আমাৰ টিভিও "ৰঙীল" বনাও !
৯) কিনা চুয়েটাৰটো "সামৰণ" । এইটো মায়ে গুঁঠা । ঘৰত পিন্ধা ।
১০) ৰেঞ্জাৰ চাইকেল ! কি সুখ !! কি প্ৰাপ্তি !!! কি সুন্দৰ জীৱন !!!!
No comments:
Post a Comment