তিনিটা

তিনিটা
১) প্ৰায়বোৰ চিটীবাছৰ ৰং একেই । কিছুমান নতুন কিছুমান পুৰণা । মটৰ চাইকেলত গ'লে বাছৰ পিছফালে এবাৰ হ'লেও ৰ'ব' লগা হয় । প্ৰায়বোৰৰেই পিছফালে STOP আৰু ধন্যবাদ । ফুলৰ থোপা, হনুমান, পাহাৰৰ মাজেৰে সূৰ্য্য ।

তাৰ মাজৰে এখনৰ পিছফালে এই তিনিটা শব্দ -- "জীয়াই থকাৰ সপোন" ।
জালুকবাৰী-বেলতলা পথত চলা বাছ ।

প্ৰায়বোৰ চিটীবাছ ৰঙে ৰূপে একেই ।
মালিকৰ জীৱনবোধ বেলেগ বেলেগ ।

২) চকুতলগা দোকানতকৈ চাইকেলৰ পিছফালে বাকচ লগোৱা (ঠেলা) ৰাষ্টাৰ কাষত ৰৈ থকা দোকানৰ বেকাৰীৰ দুটা বস্তুৰ সোৱাদ মোৰ বাবে বেছি । ভেজিটেবল পেটিচ আৰু ক্ৰীম বান । দামো সস্তা । কিন্তু সোৱাদ আৰু সতেজতা দামী দোকানতকৈ মই বেছি পাইছোঁ । বাকী ব্ৰেড আৰু ব্লেক ফৰেষ্টৰ বাবে সুকীয়া দোকান আছে মোৰ ।

বাৰু । ক্ৰীম বান দুটা পকোৱা কাগজখন সৰু হোৱা বাবে আৰু এখন কাগজ ল'বলৈ মমৰ পোহৰে পোহৰাই থোৱা চাইকেলৰ পিছফালে লগোৱা বিস্কুত, পেটিচৰ বাকচটোত মমৰ কাষতে থকা তিনিখনমান কাগজৰ ফালে হাত মেলিলোঁ ।

"ৰ'ব' । সেইকেইখন ন'লব । বস্তু দিবলৈ অনা কাগজৰ পৰা "আলগাই" থৈছোঁ কিবা এটা পঢ়িবলৈ । কিবা ভাল কথা তিনিটামান আছে । ৰ'ব' বেলেগ এখন দিম ।"

বেকাৰীৰ দোকানীৰ কথা । বস্তু দুটাৰ সোৱাদ বাঢ়িল কালি ।