নাগদেৱতাই দৰ্শন দিলে আৰু তেখেতৰ নামত ত্ৰিশখন চিঠি লিখি বিলাবলৈ দিলে আৰু এনেকৈ বিলাওঁতে ক'ৰবাত কোনোবাই লটাৰীত টকা পালে আৰু কোনোবাই নিবিলোৱাৰ ফলত আমৰণে মৰিল- এনেকুৱা অতি অবান্তৰ কথা লিখা কাগজ হাইস্কুলত পঢ়ি থকা দিনত বহুত পাইছিলোঁ । তাতোকৈ ডাঙৰ কথা সেই কাগজবোৰ লিখি সৌভাগ্যৰ আশাত বিলাই ফুৰা মানুহো পাইছিলোঁ আমাৰ মাজতে । তেনেকুৱা কাগজ পাই মই আৰু আমাৰ ঘৰৰ হেড হালোৱাই সেই কাগজত গোৱালপৰীয়া ধঁপাতৰ সুখটান দিছিলোঁ এদিন, এহুপা । মইও নমৰিলোঁ, হেড হালোৱাও নমৰিল ।
যুগ সলনি হ'ল । কাগজৰ ঠাই ফেচবুক, ৱাটচএপ এ ল'লে । কিন্তু মানুহ একেই থাকিল । এক ছেকেণ্ডত ফটো শ্বেয়াৰ কৰি অহা শনিবাৰৰ ভিতৰত ভাল খবৰৰ বাবে কাগজৰ সলনি এতিয়া ৱাটচএপত বাৰ্তাৰ শিকলি আহে । শ্বেয়াৰ নকৰিলেই বিপদ হ'ব ।
পাৰ্থক্য মাথোঁ এটাই যে তেতিয়াৰ দিনত এনেকুৱা কাগজ পালে কাগজবোৰ যিমান অপাত্ৰত পেলাইছিলোঁ এতিয়া মেছেজবোৰ উলিয়াই পেলাই দিব নোৱাৰোঁ, ধঁপাত পকাই সুখটান দিব নোৱাৰোঁ ।
No comments:
Post a Comment